2 ліпеня ў Будславе адбудзецца парафіяльны фэст з удзелам біскупаў і новапрэзбітэра

У сераду 2 ліпеня ў Будславе адбудзецца традыцыйны парафіяльны фэст у адпустовую ўрачыстасць Маці Божай Будслаўскай.

У апошнія гады галоўныя ўрачыстасці у Нацыянальным санктуарыі адбываюцца ў першую суботу ліпеня і распачынаюцца ўжо напярэдадні. Таксама сёлета Будслаўскі фэст, які ЮНЕСКА занесла ў спіс нематэрыяльнай культурнай спадчыны чалавецтва, адбудзецца 4 і 5 ліпеня (праграма ТУТ>>>).

Разам з тым, 2 ліпеня ў Мінска-Магілёўскай архідыяцэзіі адзначаецца ўрачыстасць яе Галоўнай Апякункі — Маці Божай Будслаўскай.

У сувязі з гэтым у дзень урачыстасці ў будслаўскай базыліцы адбудуцца цэлебрацыі з магчымасцю атрымання адпусту паводле наступнага раскладу:

• 10.00 – св. Імша; цэлебрацыю ўзначаліць наймалодшы беларускі іерарх, біскуп Андрэй Зноска з Пінска
• 12.00 – св. Імша; цэлебрацыю ўзначаліць першы каталіцкі іерарх у сучаснай гісторыі Касцёла ў Беларусі, арцыбіскуп эмэрыт Тадэвуш Кандрусевіч
• 18.00 – прыміцыйная св. Імша, якую будзе цэлебраваць ксёндз Аляксандр Шыманскі, новапрэзбітэр з Мінска

Пробашч парафіі  Унебаўзяцця Найсвяцйешай Панны Марыі ў Будславе ксёндз Дзмітрый Дубовік ад імя парафіянаў сардэчна запрашае ўсіх ахвотных далучыцца да супольнага святкавання адпустовай урачыстасці.

На YouTube-канале Нацыянальнага санктуарыя вядзецца прамая трансляцыя цэлебрацый з будслаўскай базылікі.